情理法？還是法理情？
里奧叔叔第一次感受到台灣情理法。
話說舊年年尾，里奧嫂懷疑台中分店有同事穿櫃桶底，所以里奧嫂對嗰位被懷疑同事進行嚴密監察，點知呢位同事明知有CCTV監控下都大膽到將公司部份既貨裝箱運走，好彩當時立即請快遞公司將嗰箱貨原封不動送返店鋪，而里奧就第一時間去到台中分店當面請該同事將紙箱打開，打開後發現一整箱貨品價錢幾萬蚊既貨差D被運走。
人贓並獲 報警處理
之前已經有蛛絲馬跡佢穿櫃桶底但搵唔到證據，但今次人贓並獲報警處理後，警察話之後里奧會收到法庭傳票，雖然今次冇財物損失，但係呢件係刑事案件，而且「侵占」罪並唔係一般罰錢了事既罪行，所以里奧日後會收到傳票出庭作證。
準時到庭 律師求情
里奧上兩星期收到台中法院既傳票，今日準時到庭有位被告人既代表律師向里奧求情，希望里奧可以與被告和解，原因係被告年少無知，今次亦準備向法官認罪，但里奧就唔明既然都準備認罪，咁做咩仲要向里奧尋求和解？🤔
是否和解 影響判刑
台灣既聆訊庭與香港法庭好唔同，一間大約2000呎既房有法官 聆訊記錄員 庭警 一共三人，里奧被招入宣誓後，法官聽得出里奧有香港人口音，就先向里奧解釋台灣法例與香港法例大不同，之後就開始將有關證據向里奧諮詢。
經過所有問題之後，法官到最後一條問題是：你會否考慮與被告和解？
法官再解釋，被告侵占罪一旦罪立，會被判半年以上牢獄，如果被告認罪的話會有減刑，但如果受害人與被告人和解，被告一樣會有刑罰，但刑罰就會減輕「應該會減輕很多」。
里奧當時完全無法作決定，最後法官建議里奧在旁聽完對被告人既聆訊再作決定。
聆訊完畢 法官要求里奧決定會否有和解意願
呢一刻真係好難決定，因為聽完聆訊之後亦感覺唔到被告有悔意，相反法官都向律師表示以被告的辯詞唔覺得被告有意認罪，但律師就表明被告已同意認罪，亦希望向受害人和解，里奧既感受就係，呢位年輕人唔到最後都可能未知自己將面對緊啲咩，呢一刻里奧感覺到一股強烈既壓力，到底佢要唔要入去坐半年以上，決定權就好似係里奧手上，完全視附里奧是否和解。
法官、律師都望向里奧，要結束今日聆訊前表態到底有否意願和解，因為只係要表達意願，處於一個咁大壓力既環境下里奧真係唔忍心說『不』，所以最後就向法官表示「有意願和解」。
最後律師表示會約里奧洽談和解條件，其實對於一個細路女又有咩條件好傾，只係唔想佢年紀輕輕就背上一係罪行+6個月既判刑，但到底最後會發展成點，里奧依家都唔知，等對方律師搵我先算，但係將被告既判刑決定於受害人和解意願既基礎上，里奧都係頭一次聽，而且發生係自己身上，壓力好大。
但今日咁樣既安排，即係代表不久又要去台中上庭多一次🤦♂️
各處鄉村各處例，聽就聽得多，但實際經驗嚟咗咁耐都係第一次
希望呢位前女同事可以改過自新。
#里奧叔叔
Search